الخصوصية
هنا شنو كيسجل unkado، علاش، وشكون يقدر يشوفو.
الحساب ديالك
باش تصاوبي ليستة ولا تهدي شي هدية خاصك حساب: السمية، الإيميل، التيليفون وكلمة السر. كلمة السر كتسجل مشفرة، حتى واحد ما يقدر يقراها، حتى حنا.
إلا زدتي تصويرة ديال البروفيل، كتبان حدا الهدايا اللي هديتي.
الليستات ديالك
على كل ليستة كنحتافظو بسمية الليستة (بحال سمية البيبي ولا العرسان)، الأجوبة ديالك على الأسئلة، الحوايج اللي اخترتي، وملي تعمريها، عنوان التوصيل (المدينة، العنوان، التيليفون).
الليستة المبارطاجة محمية بكود: غير اللي عندو الرابط والكود يقدر يحلها. كيشوف سمية الليستة، الحوايج، وشكون هدى شنو.
الهدايا والفيرمات
منين شي واحد كيحجز هدية، كنحتافظو بسميتو، المبلغ ورقم مرجعي ديال الخلاص. الوصل ديال الفيرمة اللي كيصيفط كيتستعمل غير باش نتأكدو من الخلاص.
الرسائل
إلا كتبتي لينا من صفحة التواصل، كنحتافظو بسميتك، الإيميل، التيليفون إلا عطيتيه، والرسالة ديالك، غير باش نجاوبوك.
شكون كيشوف المعلومات ديالك
الفريق ديال unkado كيشوف الحسابات، الليستات، عناوين التوصيل والوصولات، باش يتأكد من الخلاص ويوصل الهدايا. ما كنبيعو ما كنسلفو هاد المعلومات لحتى واحد، وما كاين لا إشهار لا تتبع فالموقع.
الكوكيز
الموقع كيستعمل غير الكوكيز اللي ضروريين: واحد باش تبقاي داخلة، وواحد كيعقل واش الشريط ديال الجنب محلول ولا مسدود.
مسح المعلومات ديالك
تقدري تمسحي ليستة بوحدك من الصفحة ديالها، مع الحوايج والحجوزات ديالها. غير إلا شي واحد خلص ولا صيفط وصل، الليستة كتبقى باش فلوسو تبقى معروفة فين مشات.
باش تمسحي الحساب ديالك وكلشي اللي مرتبط بيه، كتبي لينا من صفحة التواصل: كنديروها بيدينا.